Podemos facelo meyor

Ún de les mayores preocupaciones de los ciudadanos ye la política. Y nun me refiero a que la xente-y dea por interesase agora na xestión de lo público. Non. Digo que cada vuelta más persones consideren a los nuestros políticos como ún de los grandes problemes actuales. Como un mal en cuenta de cómo un remediu: “son toos iguales, lo único que quieren ye figurar, chupar del bote y, en definitiva, aprovechase del sillón pa forrase o pa enchufar a los parientes”.

Y, la verdá: que-y pongan una fianza de tres millones d’euros al expresidente balear por acusaciones graves de corrupción nun ayuda muncho. Pero esti asuntu vien de bastante más atrás y va durar muncho tovía. Les encuestes del CIS enseñenlo bien: lo primero, lo que más nos esmolez, ye’l paru. Depués, y más que nada d’un tiempu a esta parte, suel figurar la mala situación económica. Cuestión que, en realidá va mui xuncida a lo anterior. El terrorismu, cola so carga dramática, sube o baxa nesti particular llistáu en función del númberu y gravedá de los atentaos. Y, como digo, lo qu’adulces va ganando enteros ye l’esmolecimientu xeneral pola corrupción y pola incompetencia de los nuestros representantes públicos. Nun ye que nun solucionen los nuestros problemes; ye que, amás, dedíquense a robar.
Los grandes discursos en campaña electoral insisten dende siempre na necesidá de rexeneración de la vida política. Unos proponíen facer normal lo que ya yera normal, otros prometieron un cambiu pa que’l país funcionara, húbolos qu’apostaron por una segunda transición, otros, por contra, ofrecieron talante pa gobernar y el nuestru presidente afirmó qu’arreglar Asturies diba dar munchu trabayu. Bueno, son maneres distintes de dicir lo mesmo: señores, dénnos el so votu que podemos facelo meyor. Y sí, poder sí pueden, pero, realmente ¿fixéronlo?
A la vista los resultaos, cuesta saber si tenemos los políticos que nos merecemos o si, realmente, son un espeyu de la nuestra sociedá. Y, cuidáu, porque les dos coses nun son contradictories. Ye más, yo cuento que les dos son verdá y tengo pa mi qu’igual el problema ye que pidimos-yos demasiao a los nuestros gobernantes. Contamos qu’ellos han solucionanos los nuestros problemes y por eso-yos emprestamos la llave de la nuestra casa. Pero, eso sí, ensin comprometenos a nada, ensin participar nosotros na solución. Y, claro, d’ehí vienen les decepciones. Por eso propongo otra manera de facer les coses: nun-yos demos tanto y nun-yos pidamos tanto. Vamos da-yos la xestión de l’alministración pública. Pero namás eso. Y vamos pidi-yos que tiren la basoria. Namás eso. Y del restu, encargámonos nós.