Digan lo que digan, esta campaña electoral va ser; ta siendo ya; mui interesante. De mano, va ser distinta a cómo contábemos hai meses. El resultáu ta mui abiertu y ya nun va valir dexase llevar. Por descontao va siguir habiendo un votu cautivu o un votu d'inercia a les grandes fuerces. Eso naide lo niega: el bipartidismu ta mui instaláu y nun va esbarrumbar d'un día pa otru. Tamos falando, polo tanto, d'un posible revolcón electoral, non d'una revolución, ente otres coses porque sigue habiendo un porcentaxe de la población que yá sabe lo que va votar y nada nin naide va facelo camudar. Somos, polo tanto, una sociedá conservadora. Conservadora d'isquierdes o de dereches; pero conservadora. Y, anque too esto ye verdá, nun ye menos cierto qu'hai otra montonera xente que ta decidiendo'l votu y que va esperar al últimu momentu pa decidilo. Y eso, esa incertidume, ye lo que fai qu'estes elecciones seyan les más abiertes; y les más entreteníes; de les últimes décades.
La isquierda, n'esto del votu, suel ser más abstencionista. Quiero dicir que, o voten al partíu de siempre o nun voten; queden en casa. Por eso cuento qu'agora, cola que ta cayendo, munchu del votu de castigu socialista va tresformase n'abstención. El retu del candidatu, Javier Fernández, va ser, polo tanto, movilizar esi electoráu y eso, permítanme l'atrevimientu, parezme que nun yera lo que tinía previsto el secretariu xeneral nin lo que s'axusta más al so perfil como comunicador: Javier tresmite rigor y seriedá, sí, pero nun cautiva les mases peleando'l votu caleya a caleya.
Tolo contrario que la novedá de la xornada; Francisco Álvarez-Cascos. Ye una novedá mui particular porque, con diferencia, ye'l candidatu más conocíu y con mayor trayectoria de tolos grandes. Tol mundu tien una idea preconcebia d'él, pero, permítanme tamién la opinión, ye'l que más ta removiendo la pota y les conciencies y ye'l que, pa bien o pa mal, ta marcando'l ritmu a los demás.
Sobremanera a Isabel Perez-Espinosa; la candidata del PP; una muyer que cuenta con tol nuestru respetu pero a ña que punxeron, o dexose poner, nuna situación más bien enguedeyada. N'otres circunstancies el so nomamientu diba encaxar nuna estratexa natural de renovación xeneracional. Ya saben: nuevos tiempos, nueves cares. Pero, nes circunstancies actuales, esi discursu ente continuista poles sigles y renovador pola edá ya nun tien nengún sentíu: va tener que pelear hasta pol últimu votu y va tener que xustificar hasta la última abstención. Por eso nun-y val una estratexa de mínimos y por eso va tener qu'enseñar los dientes y dalguna idea rompedora que la coloque na picota.
Y por eso, por unos y por otros, esta campaña va ser cualquier cosa menos aburrida.
0 comments:
Publicar un comentario en la entrada