Queden hores pa qu’empiecen les elecciones. Hasta que nun termine la votación y empiece’l recuentu, tolo que pasó nun ye namás que teoría. Y ye bien difícil saber qué va pasar, de verdá, na práctica. Selmana a selmana, mes a mes, les coses fueron evolucionando d’una manera, como poco, sorprendente. Y, cuidáu, porque la partida tovía nun terminó. Hai cuatru meses parecía que namás había dos posibilidaes: que tolo más que podía haber yera una alternancia ente dos opciones bien afitaes y que la gracia del guisu taba en ver qué papel podíen xugar los otros aspirantes a entrar en parlamentu. UpyD, Ideas, Bloque, Uras-Pas y dellos otros contaben entrar na Xunta Xeneral; Izquierda Xunida contaba caltener los sos diputaos; y unos y otros aspiraben a influir colos sos escaños faciendo, nel meyor de los casos, de bisagra cola que condicionar mayoríes. Pero, como digo, hai cuatru meses la cosa cambió radical. Y al panorama previstu añadiose un partíu nuevu que removió tola pota. A unos gustara-yos más que a otros. Unos votaranlu y otros preferiríen nun velu delantre. Val. Pero lo que naide puede negar ye que Foru Asturies, el partíu d’Alvarez-Cascos, ta añadiendo interés a esta campaña y va facer que’l resultáu d’estos comicios tea más abiertu que nunca.
Fueron munches les vueltes en qu’una fuerza asturiana fexo por entrar na nuestra institución cimera. Y hubo veces en que se consiguió. Nel añu 1991, Coalición Asturiana sentó un diputáu en parlamentu. Cuatru años depués, Xuan Xosé Sánchez Vicente, repitió escañu ya como miembru unicamente del Pas. Y otros cuatru años más tarde, en 1999, Sergio Marqués, Leonardo Verdín y Juan Carlos Guerrero formaron grupu parlamentariu con Uras. Con too y con ello, d’entós p’acó, nun volvió haber representación de mandatu estrictamente asturianu -más que cola presencia temporal del Bloque ésti últimu añu, ye verdá- y el bipartidismu parecía entós consolidase como’l nuestru réxime definitivu. Pero, insisto, el futuru nunca ta escritu y too apunta a que Foru Asturies va entrar de manera bultable nes nuestres instituciones. La cuestión nun ye menor. Anque namás fuera por eso, la lexislatura qu’empieza agora va estremase bien de les anteriores. L’anormalidá asturiana va cambiar. Siendo como somos un país con una importante carga identitaria nun yera normal nun ser a enseñala claramente nel arcu parlamentariu. Y esi desequilibriu va acabar. Con más de diez mil militantes y candidatures en setenta conceyos, un partíu asturianu va enseñar, con fuerza, un puntu de vista nuestru, propiu, asturianu. Y eso, pa los que llevamos años comprometíos cola nuestra identidá, representa una oportunidá única. Supón el comienzu de munches coses. Enseña l’empiezu del cambiu.
0 comments:
Publicar un comentario en la entrada