Opciones abiertes

Esti sábadu celébrense les sesiones constitutives de los nuevos ayuntamientos. Va haber setenta y ocho conceyos asturianos escoyendo Alcalde. Y, home, otra cosa nun sé, pero la cosa va tar mui animada y mui abierta. Nun ye gota fácil saber qué va pasar. Siempre resulta bien enguedeyao interpretar lo que quier la voluntá popular pero, esta vuelta, cuento que la dificultá ye tovía mayor. Y dígolo porque parez claro que la xente votó polos cambios; por distintos tipos de cambios; pero ye agora cuando toca tresformar esa voluntá abstracta en vares de mandu concretes.
Antiguamente, cuando les opciones de gobiernu yeren prácticamente dos, los calculos de probabilidaes yeren más evidentes. Pero agora, con más actores nel escenariu, el resultáu final queda más abiertu y les estratexes d’unos y otros son bien estremaes.
Nel casu del PSOE, la incógnita ye menor. La FSA ensiguida enseñó la so voluntá de pautar con Izquierda Xunida pa nun favorecer gobiernos de derecha. Con consecuencies contradictories, por descontao. La más rescamplante, la d’Uviéu; onde, cola dimisión de la so candidata y l’anunciu de la intención del grupu socialista d’abstenese na votación, queda llibre’l camín pa qu’asuma l’alcaldía la llista más votada. Ello ye, la del partíu popular. O, dicho d’otra manera, pa que siga de rexidor don Gabino de Lorenzo por sexta vez consecutiva. En fín; abulta sorprendente, como poco, que xusto cuando de Lorenzo pierde la mayoría absoluta y existe la posibilidá numérica de sustituilu nel sillón, la FSA decida, lexítimamente, nun afondar nesa vía. Pero, como digo, ye una opción respetable que, ente otres coses, va supone-yos, a ellos y a Izquierda Xunida, el gobiernu de 47 conceyos.
Aplicando esa lóxica -van permitímelo- antigua, ye hasta normal que’l PP proponga otru pautu global a Foro pa sumar votos ellí onde, xuntos, podríen ser mayoría. Pero lo que nun ye tan normal ye qu’esi pautu pretenda incluir la formación del gobiernu del país. Na mio opinión, son dos entidaes diferentes; hubo dos urnes distintes onde meter los votos; y hubo, como ye conocío, dos resultaos bien distintos. Por eso digo que non; que nun me parez razonable, nes circunstancies actuales, condicionar lo uno a lo otro: los conceyos y el país nun son intercambiables.
Y por eso anecio en que los resultaos finales, cuando queden poques hores pa les sesiones constitutives, siguen abiertos; más abiertos que nunca; y eso ye bueno. Esa incertidume ye buena porque supón que les estratexes del pasáu ya nun casen bien colos desafíos nuevos del presente. Y eso ye otra amuesa más de que n’Asturies tamos viviendo una especie de segunda transición. Bienllegada seya.