Saber ganar

Ye importante saber perder, pero tien muncho más aquello saber ganar. Un paisanu ye a llevantase depués d’una derrota, pero un babayu nun se repón nunca d’una victoria. Y con estes afirmaciones toi refieriendo al asturianismu políticu en xeneral. Ponme malu ver como l’asturianismu nun ye a reconocer los avances y anecia en nun ver como propios los méritos que naide-y termina de negar. Vamos a los númberos: resulta que, pola primer vuelta en décades, un partíu asturianu ganó les elecciones autonómiques. ¿Y qué facenos nosotros entós? Enseñar cómo l’asturianismu sacó los peores resultaos de la so hestoria. ¿Y por qué? Pues porque sumando los datos d’Unidá-Bloque, Uras-Pas y Conceyu Abiertu perdiéronse nueve mil votos. Pues n’home non; yo niego la mayor: los peores resultaos de la so hestoria sacolos el PSOE y el PP. Ellos sí que salieron derrotaos y dígolo con deportividá: ente los dos perdieron dieciséis diputaos, que fueron exactamente los que ganó Foru Asturies. Y a esa victoria de Foru Asturies tamién contribuyeron esos famosos nueve mil votos del asturianismu. O munchos más, si tomamos como referencia los resultaos d’elecciones anteriores.

Pero, claro, van responder dalgunos, la cosa ye que Foru Asturies nun ye un partíu asturianista. ¿Y por qué non? pregunto yo. Pues porque nun lleva la oficialidá nel so programa, habrán retrucar otros. Val, pues entós ¿Por qué nun contamos como votos asturianistes los d’Izquierda Xunida que lleva años defendiéndola y aguantó bien los sos cuatru diputaos? Pues porque, por culpa de lo so obediencia federal, Izquierda Xunida nun ye un partíu dafechamente asturianu... Y vuelta empezar. Y señores, lo dicho: que somos únicos en sumar siempre restando, en ver la botella mediu vacia y en apuntanos voluntariamente a caballu perdedor. Y digo más: a ver quién me desplica por qué los cuarenta y cuatru mil votos qu’algamó en tiempos Unión Renovadora Asturiana nun yeren asturianistes, pero los seis mil que termina sacar agora sí que lo son. ¿Ye porque diben en coalición col Pas? Bueno pues, entós, a ver por qué nun se contaron como asturianistes los sesenta mil votos d’Izquierda Xunida nes elecciones d’hai cuatru años cuando diben en coalición col Bloque. ¿Yeren demasiaos? ¿Asustanos ganar? ¿Somos tontos?

En fin, lo dicho: que parez que nos cuesta reconocer lo propio. Y, mientres tanto, hailos que son espertos no contrario. Plasma ver el descaru col que’l Pp asturianu apuntase agora a la victoria del centru-derecha y diz -palabres testuales- que, al final, la división salió-yos bien. Y yo nun pido eso; nun digo que perdamos l’autocrítica, pero, por favor: a ver si dexamos d’autocastiganos tanto y somos a reconocer una victoria cuando la vemos.