Ya repuna tanta insistencia en descalificar lo que nun se conoz. Ya repuna tanto aneciar en que lo que nun s'entiende ye un inventu. Y ya repuna, a última hora, la nuestra zuna de despreciar tolo qu'ignoramos. Pero por munchu que repune, too esto sigue pasando equí y sigue pasando agora; con más frecuencia de lo que contamos. Pasó, por casu, fai un par de selmanes cuando un políticu de los nuesos (asturianu, entiéndese) afirmó qu'equí (n'Asturies, entiéndese) lo que facía falta, agora, yera más España y menos nacionalismu (asturianu, entiéndese). Pero eso nun foi lo peor. Lo peor llegó cuando intentó argumentar la so opinión y dixo qu'esti nuevu ástur-rexonalismu inventáu (inventáu col permisu de toles xeneraciones d’asturianistes, entiéndese) taba alimentando la rotura de la unidá d'España, contribuyendo al disparate autonómicu y condergando a les próximes xeneraciones al paru y a la emigración. Y habrán entender que ya repuna tanta tontería.
Siguimos diciendo demasiaes tonteríes en temes identitarios y políticos. Ente otres coses porque nun tamos avezaos a analizar la identidá dende una perspectiva política. Pero dende una perspectiva seria, de política con mayúscules; y non d’una política entendida como un intercambiu de descalificaciones y llugares comunes que ye a lo que tábemos avezaos hasta agora.
El nuevu mapa políticu asturianu ta por facer. Más que nada porque hai un elementu nuevu y evidente: un partíu recién llegáu, que gobierna en minoría, que tien menos d’un añu de vida y que se define como autonomista. Y, pongamos como nos pongamos, munchu de lo que va pasar nos años vinientes va xirar alredor d’elli y de dos coses. La primera, de la capacidá d’esti nuevu partíu de concretar los sos proyectos; de dar repuesta a les sos promeses; de da-y cuerpu a la expectativa xenerada: ello ye, d’enllenar de conteníu los sos discursos y les sos declaraciones de principios. Y dos, la estratexa de reposicionamientu que, énte esto, terminen adoptando los otros protagonistes de la partida: de cómo van definir los puntos febles del recién llegáu y de per ónde van atacalos. Por eso toi convencíu que, nos años vinientes, vamos, tener que ver cómo l’asturianismu empieza ser atacáu políticamente. Y defendíu. Cosa qu’hasta agora ya pasaba. Ye verdá. Pero la diferencia ta en que, d’equí pa en delantre, l’ataque va venir dende la oposición y la defensa dende’l gobiernu. Y esti pequeñu detalle va facer; ta faciendo ya; que munchos de los argumentos nun valgan y que tengamos que pensar otros nuevos y meyores. Y eso; la necesidá de pensar y d’argumentar con más fundamentu; ye otra de les coses buenes d’esta nueva situación.
0 comments:
Publicar un comentario en la entrada