Un pocoñín más d’urbanidá, namás eso.

Va tiempu que vengo observando un rasgu distintivu pol que a los asturianos se nos reconoz dende afuera ensin que nosotros, necesariamente, nos decatemos d’ello. A tolos pueblos se-yos termina asignando un tópicu y el nuestru, cuido yo, ye el de ser aldeanos. Y a ver: ser aldeanos nun ye mala cosa. Pola nuestra historia, poles nuestres circunstancies, pola nuestra situación, los asturianos apreciamos bien lo de ser paisanos. Tener palabra, ser normales o dicir les coses clares son cualidaes nes que nos presta reconocenos. Y eso ye bueno. Lo malo ye que detrás d’esa sinceridá, d’esa normalidá campechana, bien de veces lo que s’escuende ye una falta evidente d’educación, d’urbanidá y d’esquisitez.
Porque, la verdá, mui esquisitos nun somos; pa qué nos vamos engañar. En demasiaes ocasiones confundimos les buenes formes cola repunancia, el protocolu cola pijería y la buena educación cola blandenguería. Y caemos no contrario. Pongo un casu: la puntualidá, o más bien la falta d’ella. Acudan ustedes a un debate públicu, a una conferencia, a una mesa redonda cualquiera, y van ver cómo la mayoría nun fai nada por adaptase a los tiempos predeterminaos. Naide pon interés nengún n’empezar a la hora nin en midir la so intervención. O peor tovía: naide cuenta que tenga que ponelu. Porque somos asina: mui espontáneos, mui poco estiraos, mui d’andar per casa. Pero, a lo último, esa despreocupación acaben sufriéndola los demás: los que fueron puntuales y llegaron a tiempu o los que quieren marchar a una hora prudente. Pongo otru exemplu: la nuestra manera pública de pidir les coses. De mano, pidir ta mui mal visto. Equí, los paisanos, o esiximos o reivindicamos. Pidir, igual que vender o negociar, ye de cobardes. Y eso nun va con nosotros. Nosotros lo que queremos ye que nos den lo que ye nuestru; a lo que tenemos derechu: lo que nos correspuende. Nun somos aprovechaos; nun queremos más qu’eso, pero tampoco menos. Y, si tenemos que lo andar pidiendo, entós malo; ya nun lo queremos. O armamos la de coyer.
Pero, claro, el mundu nun furrula esactamente asina y topamos pa con él. Y, como digo, nun me parez que seya una casualidá. Tontos nun somos y hai asturianos que llegaron mui alto por distintes razones. Agora viénenme a la cabeza cuatro exemplos: Fernando Alonso, Hevia, la princesa Letizia o Melendi. A min los cuatro caénme mui bien, confiéso-yoslo. Pero tamién veo que tolos cuatru arrecostinen cola mesma fama de poco diplomáticos, o de distantes cola prensa, o d’armala nos aviones. Y tengo pa min qu’eso tien munchu que ver con esa sensación tan nuestra de ser como somos, de ser nosotros, de ser normales. Pero, señores, la normalidá nun esiste: ye namás un puntu de vista. Por eso digo que a tolos asturianos; incluios usté y yo; como buenos aldeanos que somos, nun nos sobraba un pocoñín más d’urbanidá.