Agora non, qu’entro de serviciu

Hai una escena na película “Torrente” que ye mui gráfica y vien al casu. Entra’l detective Torrente –ya saben: el clásicu babayu que representa lo peor de toos nosotros- entra, digo, nun chigre y pide un vasu. Y depués, a too correr pide otru y otru y otru más. Cuando ya lleva media docena de güisquis en cuerpu, vuelve pregunta-y al chigreru la hora. -Falta un minutu pa les doce- contesta-y. Y, entós, Torrente ponse mui seriu y diz: “Entós para, qu’entro de serviciu”.

Ye difícil establecer cual ye’l minutu ceru en qu’empiecen les propies responsabilidaes; por exemplu la de nun beber tanto de serviciu o la de cuadrar les cuentes. Pero ta claro que la herencia recibida influi y munchu. La oposición asturiana fai mui bien controlando al nuevu gobiernu con rigor y criteriu. Igual que’l gobiernu central cumple cola so obligación reclamando firmemente al executivu autonómicu’l cumplimientu de los compromisos comunes de déficit. Pero llama l’atención la distinta vara de midir d’unos y otros. De mano, plasma ver cómo’l mesmu gobiernu central que foi tan comprensivu y displicente col déficit qu’acumuló añu tres añu la saliente alministración autonómica, enseña agora una impaciencia, como poco, chocante. Yo díría qu’electoralmente chocante. Igual que plasma tamién ver a los portavoces autonómicos de la nuestra oposición esixir comparecencies y execuciones inmediates de proyectos cuando tuvieron tantes lexislatures atrás pa facelo y nun lo ficieron. Pero eso nun ye lo peor. Lo peor ye que munches d’estos desaxustes y incumplimientos tan conociéndolos agora, igual que gran parte de la oposición y tola opinión pública asturiana, precisamente de la mano del nuevu gobiernu. Colo que la paradoxa ye doble: tamos queriendo matar al mensaxeru por contanos, non lo que pasó na casa d’enfrente y nosotros nun podíemos saber; sinon lo que tábemos viviendo na nuestra propia casa y nun ficimos nada por entender. Pero, si me lo permiten, yo diría que la paradoxa ye inclusu triple: los mesmos qu’agora anuncien rigor colos númberos del déficit, van recompensar a los propios responsables d’incumplilos con un puestu de representación destacáu y ye que, como sabrán, hai munches posibilidaes de que l’expresidente Areces encabece la llista asturiana al congresu o al senáu pol partíu socialista nes vinientes elecciones xenerales.

Cualquier alministración tien como oxetivu ganar la reelección. A mi eso nun me precupa. Cuento, inclusu, que la tensión electoral ye buena pal sistema y que l’exame al que sometemos a los nuestros alministradores cada cuatru años ye imprescindible. Pero d’ehí al electoralismu fívolu, al populismu ramplón, hai un cachu. Y enseñase agora como indignaos pol descuadre de les nuestres cuentes –qué quieren que-yos diga- entra dientru d’esi cachu.