Tenemos razón, y puntu.

Pos non; les coses nun furrulen asina: nun basta con tener razón. Pa consiguir resultaos positivos, en cualquier campu de la vida, ye fundamental –aparte tener razón y un migayín de suerte- ye fundamental, digo, acertar na estratexa y trabayar duro. Y si, pa enriba, falamos de política, o d’asuntos con trescendencia pública, esta afirmación tenemos que la llevar a categoría de dogma. Un exemplu: esti periódicu nel qu’escribo –Les Noticies- cumple quince años. Llevamos quince años teniendo razón... pero ¿Importa eso? Pues, la verdá, non; porque lo importante, repito, nun ye namás tener razón: ye acertar nel camín y aneciar pa con ello.

Otru exemplu: dende les últimes elecciones soi conceyal en Noreña y esta selmana d’atrás volví veme nuna tesitura d’esti tipu: nuna contradicción entre razón y eficacia. Los compañeros de Conceyu Abiertu presentaron una moción pa esixir al Alcalde que tomara una serie de midíes en defensa del asturianu. Yo tar, taba d’alcuerdu col fondu del asuntu. ¿Cómo nun lo voi tar? ¿Cómo nun voi tar a favor de la defensa del asturianu? ¿O qué ye que tengo qu’andar enseñando ceritificaos de buena conducta asturianista a estes altures? Y igual que yo, el mio grupu políticu. Porque –que naide s’enquivoque- Foru Asturies tamién ta a favor de la defensa del asturianu. Pero’l problema nun ye ési. El problema ye que, tal como-y dixi por tres vegaes y hasta l’últimu momentu, al portavoz de Conceyu Abiertu, había defectos evidentes na propuesta. Defectos qu’aconseyaben retirala, refacela, negociala, presentala en comisión y, depués, consiguir aprobala en plenu pero non como una simple moción, sinon como un auténticu reglamentu o unes ordenances que regularen l’usu del asturianu na Casa Conceyu d’equí pa en delantre. Pero nada d’eso se fexo. Por contra, decidiose siguir alantre cola moción. Y, claro, nun pasó la primer peñera. Yo nun m’opuse; abstúveme; pero da igual: si llega aprobase, tampoco nun diba valir pa nada. Y nun diba valir pa nada –aparte de pa enseñar cuánta razón tenemos- porque, insisto, pretendía un imposible: pretendía obligar al Alcalde a facer una serie de coses (llamar por teléfonu a Ana Cano, nomar a tres conceyales como intérpretes voluntarios, usar un traductor d’internet...) a les que nun lu podemos obligar vía plenu. Aparte de llamalu autoritariu y intransixente. Y aparte d’apoyase na llei d’usu que -a ver si nos vamos enterando- nun obliga a les alministraciones locales nin a la central: obligar, obliga namás a l’alministración autonómica.

Por too eso digo, con tol respetu y con tol cariñu, que vamos mal perdiendo batalles por mirar namás pa tola razón que tenemos y nun ser a atender al restu de cuestiones necesaries. Y otru día, si eso, desplico cómo podemos arreglar esto.