El Niemeyer diba desnudu

Ye verdá que ca ún ve la feria como-y va n’ella. Ye verdá. Pero, pamidea que, mirémoslu per onde lu miremos, l’Emperador va desnudu; completamente desnudu. Tengo pa mi qu’ustedes conocen bien el cuentu: unos pufistes convencen a un Emperador pa face-y un traxe con una tela tan curiosa, tan curiosa, que nun son a vela namás que los mui intelixentes. Y, claro, como naide quier almitir que nun ve la tela –porque haber nun hai tela nenguna- l’Emperador acaba paseándose pela cai en porrica hasta qu’un neñu grita lo que tol mundu sabe pero naide diz: que l’Emperador va desnudu.
Nel mundu de la cultura hai munchu Emperador desnudu. Hai demasiada xente y demasiaes instituciones que, detrás d’un discursu vaciu, cosmopolita y grandilocuente, nun tienen nada qu’enseñar. Nada. Y por eso cuando un neñu –o un gobiernu recién llegáu- glaya al altu la lleva lo que tol mundu cuenta pero naide diz –como, por exemplu, que pa siguir dando perres necesita auditar les cuentes o que la so incorporación al patronatu tien que ser proporcional a la so aportación económica- la reacción ye desproporcionada. O demasiao proporcionada al despropósitu qu’hai detrás. Ello ye, retrúcase a esta solicitú d’auditoría diciendo que ye un ataque a la cultura con mayúscules, que ye la ruina pa la imaxe de la ciudá o que la creación artísitica nun ye medible nin opinable... Tonteríes.
Dos nun riñen si unu nun quier. Ye verdá. Pero lo importante del enguedeyu del Centru Niemeyer nun ye la riña en sí, nun ye la polémica, nun ye’l ruíu: son les nueces. Y les nueces d’esti asuntu son que, detrás de la pómpara, les estrelles mediátiques y la promoción internacional, hai unes cuentes completamente inxustificaes, nun hai nengún proyectu sólidu de continuidá y nun existe nenguna voluntá de los actuales responsables pa caltener un debate abiertu y tresparente sobre la Fundación. El Niemeyer nació pa otra cosa y dalgún día, cuando esto aposiente, vamos poder empezar entendelo de manera sosegada. Pero, mientres tanto lo entendemos y non, lo que tamos viendo ye que lo más que xustificaba esti proyectu grandiosu yera la inercia, l’apoyu ensin crítica y el gastu promocional ensin xustificación. Ello ye, l’aplausu colectivu al Emperador mientres pasea pela cai completamente desnudu y tol mundu diz lo guapu que va y lo bien que-y queda’l traxe.
La fiesta acabó y ye normal que busquemos culpables. Pero los culpables nun son los que dieron la señal d’alarma y agora zarren el grifu. Non. Los verdaderos aguafiestes son los que gastaron a lo xo y agora niéguense a enseñar les cuentes clares. Normal -otra manera- porque nun tienen nada qu’enseñar: van desnudos.