El xenru exemplar

Dicía Charles Chaplin que pa facer gracia y ganar la complicidá del públicu yera importante enseñar un contraste. Si nuna comedia, por dicir, vemos cómo-y cae perriba un bote pintura a una señora con pinta ricachona, abrigu visón y cara de pocos amigos, eso va movenos a risa. Risa que, otra manera, nun diba provocase si la víctima fuera una muyer con pinta probe y güeyos de llegar mal a fin de mes. Somos asina: préstanos ver cómo los presuntos trunfadores fracasen y cómo los eternos perdedores lleven una alegría. Y seique por eso hai una unanimidá cuasi total en condenar, ya de mano, les actividaes irregulares del señor Urdangarín. Efectivamente: que’l xenru del Rei, del que toos contamos tien la vida más qu’asegurada, ande dedicándose a defraudar a les alministraciones –incluyendo un intentu fracasáu colos republicanos del tripartiu catalán- y a enriquecese col dineru públicu nun tien perdón de naide. Naide lu entiende, naide lu va perdonar y naide lu va defender, nin siquiera nel planu humorísticu.

Defensa y entendimientu que, por ciertu, bien que tuvieron otros delincuentes probaos y condenaos que disfrutaron y disfruten tovía de la complicidá de munchos. Sigue habiendo xente que ve a la probe Lola Flores como una víctima del celu recaudador y exemplificador de la inspección d’Hacienda. O al “Dioni” como un gayu que robó un furgón d’un bancu ensin pegar un tiru pa gastar el botín del señor Botín (hai que ver qué apellíu pa un banqueru) nuna folixa envidiable. O que s’enfotó nos pagarés-basoria de la familia Ruiz-Mateos porque contó que les sos munches condenes fiscales y les sos evidentes práctiques fraudulentes yeren consecuencia poco menos que d’una persecución de parte de los Gobiernos. O qu’aplaudieron y siguen aplaudiendo la seducción fácil de Mario Conde porque lu entienden como un trunfador reconvertíu en perdedor y, otra vuelta, en trunfador que por eso mesmo conoz la cara oculta de los poderosos y agora quier contánoslo; anque, la verdá, contar nun cuente nada.

Non: nun somos toos iguales énte la llei y munchu menos énte la opinión público. Y, por eso mesmo, esti asuntu Urdangarín pue valinos p’avanzar nel convencimientu de que nun hai atayos. Que la picaresca ye siempre un desastre. Que la corrupción nunca ye simpática. Que nun hai lladrones buenos o malos, anque caigan simpáticos o antipáticos. Que les formes y les apariencies y los controles son importantes. Sí. Pero que ye munchu más importante tovía’l fondu. Y el fondu d’esti asuntu ye que naide tendría que convencenos nunca más del tira p’alantre que llibres porque eses coses sábese cómo empiecen pero nunca, nunca, cómo puen terminar.