Lo difícil que ye comunicar

Pasu ente pasu, adulces, les coses van esclariándose. Y, ente les coses que van esclariándose, tol mundu apautamos en qu’un gobiernu tien que facer coses. Pero tamién apautamos en qu’un gobiernu tien que facer facer coses. Y con esti pequeñu xuegu de palabres, por repetición, nun me refiero -como yá dixi otres vegaes- a qu'un gobiernu tenga que facer el doble de coses. (O nel casu asturianu, el triple, yá que ta a tres turnos). Non. Sinón a qu'un gobiernu tien que consiguir que los demás faigan coses.

Consiguir que los demás faigan coses ye casi tan importante como faceles. De fechu ye igual d'importante anque, ser, nun ye abondu porque, siguir, sigue faltando lo fundamental. Y lo fundamental ye que toes eses coses que fai -y fai facer- un gobiernu terminen llegando a ónde tienen que llegar. ¿Y a ónde tienen que llegar toes eses coses que fai un gobiernu? Pues a los amos del gobiernu. Ello ye, al pueblu, a la xente, a los votantes: a tolos ciudadanos. Eses, eses son en definitiva los trés coses principales que tien que facer cualquier gobiernu: comunicar, comunicar y comunicar.

Comunicar, eso ye lo más importante siempre. Y lo más difícil. Y ye lo más difícil porque sigue habiendo mui mala prensa en too esto de la comunicación. Y sigue habiendo mui mala prensa en too esto de la comunicación porque demasiada xente sigue pensando que l'esfuerzu que s'emplega en comunicar piérdese en gobernar. “Menos falar y más actuar”, suxeren dalgunos. “Nun se ve lo que fai’l gobiernu”, dicen otros. “Lo que nun sal nos periódicos nun existe”, añeden los últimos. Y lo que pocos concluyen ye que, en política, l'acción y la comunicación son la mesma cosa; esactamente la mesma cosa. El verbu ye la ferramienta; la palabra ye la fuerza: nun esiste nenguna distinción ente la una y la otra. Una llei, una orde, una llicitación, un nomamientu... son palabres, en definitiva. Y ésa, ésa ye la ferramienta básica que tien un gobiernu -casi la única- pa facer; pa facer facer; y pa facer llegar tou lo que fai a la xente: usar bien les palabres y, con elles, priorizar y dirixir.

Pero nun ye fácil. Nun ye gota fácil, amás de lo yá dicho,–y equí empieza la parte divertida del asuntu- porque los propios medios de comunicación son tamién actores principales de la traxicomedia. Son xuez y parte. Son mediu y son mensaxe. Son árbitros y meten goles. Y por eso –pa cualquier gobiernu- ye tan difícil comunicar. Y tan imprescindible.