Empieza un añu enguedeyáu; un añu que nun va dexar indiferente a naide. Nun ye exactamente que vaiga venir cargáu de sorpreses. Non: muncho de lo que va pasar ya lo sabíemos o lo camentábemos dende hai tiempu. Recortes, axustes y reformes van ser tres conceptos que vamos sentir bien de veces d’equí pa en delantre y la cuestión va tar en si estos doce meses terminen siendo los del empiezu de la recuperación o si tovía va haber más fondu pa caer.
De mano, estrenámonos con una suba d’impuestos y con un recorte xeneral nos presupuestos de les distintes alministraciones. Como digo, nada que nun supiéremos. Pero, cuidáu: qu’eso nun quier dicir que tengamos que los asumir de manera acrítica o callada. Y, nesi contextu, llama l’atención –seique pola falta costume- l’anunciu del presidente asturianu de tomar midies llegales si nun se revisen los planes d’axuste del gobiernu central. Nun tamos avezaos a esti discursu de firmeza ente l’executivu asturianu y l’executivu español pero ye verdá que los datos rescamplen y piden una reacción proporcionada: tamos falando de perder más de mil millones d’euros de los menos de nueve mil que va suponer el total d’axuste n’España. Ello ye, si les coses nun se rectifiquen, Asturies va tener qu’asumir más del once por cientu del total del recorte global cuando la nuestra economía y la nuestra población nun vien a suponer más qu’un dos y mediu por cientu del total. Dicho d’otra manera: cada asuturianu va tener qu’arrecostinar con cuasi cinco veces más de lo que-y correspondería de media.
¿Por qué esta desproporción? Bueno pues, na mio opinión, básicamente porque les tisories metiéronse en media docena de grandes conceptos xenerales y ún d’esos grandes conceptos xenerales foron los fondos mineros y, nos fondos mineros, Asturies xuégase munchu; munchu más que la mayoría de los otros territorios. Y por eso nesta desproporción nos axustes nun tien por qué haber mala intención–anque eso nun quiera dicir nada, porque de bones intenciones tan les sepultures llenes- sinon que de lo que tamos falando equí ye de falta d’atención o, dicho d’otra manera, de nun ser a midir les consecuencies particulares de l’aplicación de determinaes midíes xenerales. ¿Hai que callar entós énte esto? ¿Hai qu’entender y asumir? ¿Hai que buscar compensaciones per otru lláu? Non. Nun me parez. La responsabilidá pública esixe tar sollerte y responder proporcionalmente cuando se considera que se tan vulnerando los principios xurídicos básicos, como por exemplu, el principiu d’igualdá. Y, por ello, parezme mui, pero que mui pertinente, una defensa xurídica de los nuestros intereses.
Aparte d’una defensa política –cosa a la que, insisto, los asturianos nun tamos gota avezaos-.
0 comments:
Publicar un comentario en la entrada