Soi asturianu y soi cultu ¿A quién pido perdón?

Pues sí; qué quieren que-yos diga: ya cansé. Ya cansé de sentir tanta grandilocuencia tocante a la cultura con mayúscules -intocable, cosmopolita y universal- enfrentada a la nuestra -piquiñina, acomplexada y de madreñes-. Ya cansé de tantu cuentu elitista de la proyección exterior de les nuestres ciudaes hasta que llegaron estos nuevos gobernantes indocumentaos. Y ya cansé de tanta repunancia de "nene, eso nun se toca, eso nun se mira, eso nun se mueve". Gobernar ye decidir, entrar en política ye metese en problemes y asumir responsabilidaes implica arrecostinar coles consecuencies. Y si nun aceptamos estes regles de xuegu elementales, lo meyor ye quedar en casa.

Carlos Rubiera, conceyal de cultura del Ayuntamientu de Xixón, gobierna y decide. Y esta selmana d'atrás decidió sustituir al director del festival de cine de la ciudá. Y ye verdá que con esta decisión ufiertó a munchos la escusa que nun necesitaben pa confirmar una tesis tan falsa como resultona: que los nuevos gobernantes de Foro quieren cargase "La Cultura", asina, con mayúscules. Sí, home sí; ya conocen la retafila: primero lo del Niemeyer, depués lo de la TPA, más tarde lo de la Selmana Negra y, agora, a lo último, esto del Festival de cine de Xixón. Hai templos que nun se profanen y el que s'atreva a ello enfréntase a lo peor. Pa los guardianes de les esencies la cosa ye evidente: Cascos y el so partíu lo único que pretenden ye esaniciar tolo qu'arrecienda a cultura porque -sigún ellos- la cultura, como buenos seudo-rexonalistes de dereches, ye sinónimu de progresía y de coses peores. Asina; "Don Pelayo contra la cultura"; titulaba un comentarista de El País, desplicando cómo, pal Gobiernu asturianu, los nuevos sarracenos a los qu'hai que combatir nun son otros que la xente de la cultura y, pa que se faigan una idea de la sutileza de tol asuntu, cerraba l'artículu cola famosa cita de Goebbels: "ye sentir la palabra cultura y echar mano a la pistola".

Pues yo ya cansé de tantu cuentu cosmo-paletista y niego la mayor: soi seudo-rexonalista de dereches si ustedes quieren, pero... siéntolo nel alma, tamién soi cultu. Inda más, llevo tola vida faciendo coses pola cultura: creándola, difundiéndola y fomentándola. Y nunca ví contradicción ente la cultura asturiana y la cultura universal. Y respíngome con una buena ópera pero tamién con una tonada. Y, sí, tamién sé quién ye Akira Kurosawa. Ah y, por ciertu, cuando salgo al práu de casa, llevo madreñes. Nos pies, obviamente. Pero tamién na cabeza. Y ¿saben qué? que nun pienso pidir perdón por ello. Por nada d'ello. Haxa salú.