Hai que ver lo intensu que resultó esti añu 2011. Un añu duru, críticu y abegosu enforma, pero intensu en cualquier casu. Un añu enllenu de cambios políticos pal nuestru país, pa España, pa Europa y pal mundu. Y un añu, en definitiva, que va marcar un primeru y un depués na nuestra vida colectiva. Ye verdá que resulta difícil resumir en poques palabres lo más destacao d’estos doce meses, pero la elección de la revista “Time” de los manifestantes anónimos como personaxe del añu parezme bien acertada. Efectivamente, foron los ciudadanos anónimos los que valtaron les dictadures de los páises árabes, los qu’enllenaron les places d’España y Wall Street entamando un movimientu que sorprendió a los propios convocantes y los que, cola fuerza de los sos votos, cambiaron los gobiernos europeos ellí onde pudieron. Y, anque nun yeren precisamente manifestantes encapuchaos, tamién foron los ciudadanos anónimos los que, cola etiqueta de “los mercaos” condicionaron munches de les decisiones polítiques d’esti tiempu. Pa bien y pa mal.
Nel casu asturianu les coses nun foron tan diferentes. O sí; depende cómo lo miremos. En cualquier casu, cuento que 2011 va pasar a la nuestra historia como l’añu en que’l bipartidismu dio pasu a un gobiernu recién creáu: a un formigueru enllenu de ciudadanos anónimos pero presidíu por daquién bien conocíu. Y, seique por ello, y consciente de la paradoxa que toi diciendo, parezme que si hubiere qu’escoyer un personaxe del añu pal nuestru país, esa portada de revista podía corresponde-y, perfectamente, al Presidente Cascos. Y, a ver, ye evidente que con esto nun digo que Cascos seya’l prototipu de manifestante indignáu (el día de los inocentes ya pasó) pero abúltame que foi Alvarez-Cascos la persona que, pa bien o pa mal, más condicionó, nesti últimu tiempu, la nuestra vida política.
Hai una disciplina de la historia que consiste en desarrollar “que hubiere pasao si…” y que, con tolo que supón de ciencia ficción, val p’ayudanos a entender meyor dellos acontecimientos, precisamente a base de negalos. Y, dende esti puntu de vista, nun cuesta munchu imaxinar que podía haber pasao n’Asturies, nestos caberos doce meses, si nun llegáremos haber contao cola presencia del señor Cascos. Les coses, con independencia de que nos abulteren meyores o peores, ta claro que diben ser distintes.
En cualquier casu, un personaxe, un presidente, un movimientu, una crisis o unos mercaos nun van parar el mundu. Son tiempos duros, difíciles y inciertos. Y si hai una cosa que nos enseñó esti añu, ya pasáu, ye que’l futuru nunca ta escritu y que mesmo les grandes figures como los ciudadanos anónimos, tol mundu, somos responsables de lo que nos va pasar d’equí pa en delantre. Vémonos.
0 comments:
Publicar un comentario en la entrada